Postos sos ramos a unu muntone
istuvulados prontos pro su fogu,
ch'es frundidu su truncu in su canale
de su mezus suelzu de su logu!
Tres dies battazzadu hat sa istrale
pro l'atterrare ca pariat brunzu
su cor'antigu. Un'arvure uguale
mai b'est creschidu in s'aidatone!
Bi deviat passare s'istradane
nou, 1gue: e sa ruspa a murrunzu
si l'est arresa acculzu inoperosa,
zacchidende sas dentes de attalzu.
Fit zeneradu in terra de aldalzu,
ma seculare amore de natura
li fattesit carena poderosa,
che mai si es mujada pro tempesta.

Mériaghe famosu pro friscura,
desit boltiju lande linna e sida:
e sos puzones bi faghian festa
ca b'aiana zibu domo e nidu.
Aiat fozas fittas de irde-calcu,
e chimas sanas; da ùe su gridu
bettaiat sa chigula arrughida,
che de poete ismentigadu in palcu.
Intro su tuvulu, e in mesu pijas,
bi campaian chentu babaudos;
e mizas, miliones, de frommijas
isticchidas che zente de zittade.

E mortas sunu ùmpare a sa pianta
chena lamentu, ca s'umanidade,
imbreaga d'asfaltu e de cimentu,
cheret terrinos pulidos e nudos.
Mal'hapat sa Natura chi cun tanta
pascenscia nòs hat dadu logu amenu,
pro chi sa zente, cun pius talentu,
bi semenet motores e velenu.
Como suelzu adìu! Caru ammentu
de su passadu! Generosu amigu
de su saltu, chi has bidu risplendente
de tazos buscos pinnetas e trigu!. ..
- S'istradane s'istirat che serpente -.