Kustu vit un'òmine e kommo est una preda
fi' kke porzeddu 'e lizu - komm'est unu zizzìu
yài vi' ggalu birde - ma vi' kke kamba 'e ozzastru
ka vit òmine zustu - ka vit òmine sàpiu
òmine 'e pake viti!
Una bida an ispèrdiu i' ssa nurra 'essa notte
kusta morte es' kreskèndeli lukore assa luna
a inoke, òminer de kasta bera
òmines ki yukìer buttones,
billu, su zovaneddu, yukìa' bbuttoner d'oro
ruttu es' su bbalente
su korpu' ll'ana bangàu a fferru vrittu e kkrudu
sa bida l'ana trunkàu
inkesu l'ana a rràyos
karre imbolàda ind'unu ribu 'e sàmbene.
Sàmbene e lludru
sàmbes ki kurre'
ssambes ki si luttat -
unu voku si vughi' dda' unu korpus
unu voku s'isparghet iffrittànde
sa notte ki mi nàskit i' ssu koro.
Kurridòre 'e kabaddos e dde vèmina' rrudes
inoke mi s'isparghe' ppastura de lakinzas
pranta noba bbi naski' fforte e rrùya
pranta 'e koraddu
pranta de sàmbene
prante de leppas e dde vertas
sinnos apertos - ispakku rùyu de melagranada -
inoke mi s'irgrani'
ggranu kin granu, koro...
In kada pupuyòne t'umbras ke ppuddèriku rude
ispriku kraru 'e sole vattu a ffrikinìas.
In brazzor mi ti yHko in etternu
a llumes tentu ti mutto
in kusta notte ki m'e' rrutta supra
dìe noba d'un'àtteru mundu
bellu e nnigheddu kene mai prus kertu
mundu mudu d'un'ànima ispèrdia
i' ssu rennu 'essa morte ustinada.
Mortu es' su sole - su sole er mortu
su sole m'ana mortu, Juke 'essu koro meu.