Narami, pastore,
it'est che t'incadenada
a i custos montes brujados,
ue roccas e bentu
lean su respiru,
ue cumpanzu e isposa t'est
sa solitudine antiga?
Che luna peregrina
andas notte e die
e che Issa ses riccu
de piuere e miseria.
Bèlidan sas arveghes isfìanchidas
ti miran cun ojos de piantu '
bramende
erva 'irde e rios limpios.
Lamentos e feridas t'istringhes
in coro e sonnias ...
Sonnias tue puru pasturas saboridas,
cantilenas d'abba cristallina
e tittas pienas.
Narami, pastore,
ite lis contas a sas istellas
in sas nottes friscas de 'eranu
solitariu, '
in custos montes riccos solu
de lagrimas e sambene?
E in sas nottes frittas e iscurosas
ite cunfìdas
a su 'entu, padronu soberanu
de custas alturas chena risu?
Farsi los miras solu
e non faeddas,
e che sempre, a sa sola,
in segretu piantu ti consumas.