Informazioni sull'opera
Falat sa notte chena luna in chelu
e s'imbrancònat addolimalzàda
in d'unu lettu fattu de ispinas
e drommit chena nìnnidu perunu.
Ma non drommit sa sarda zente mia
né zedit a s'imbèrriu affannosu
de sas suas marinas ...
E mare e terra e chelu est tott'a unu
né s'intendhet in logu una sisìa:
su mundhu paret una tumba abelta
in brazzos de sa notte.
Ma non drommit sa sarda zente mia
né zedit a s'imbèrriu affannosu
de sas suas marinas ...
E addhàe s'idet una lughe azzesa
tremulendhe che oju lagrimosu
intundhu-intundhu trappendhe sa notte:
ischintiddha 'e vida
dae sa zente mia abbaidàda,
dae sa zente mia chi non drommit
né zedit a s'imbèrriu affannosu
de sas suas marinas ...
Eo camino cun passu pesosu
e isculto su pàsidu cagliare
de sas baddhes pienas de iscuru.
Ma 'ido ancora che un oju 'iu,
sempre pius acculzu,
sempre pius azzesa.
un'ischintiddha 'e vida ch'immannat,
padrona 'e sa notte mori-mori ...
Tòrrat sa zente mia a su reposu
istracca ma non bìnchida.
E deo frimmo su passu pesosu
imbreàgu 'e disizos,
ma non solu 'e disizos;
e m'attatto 'e s'alenu 'e sas baddhes
aundhàdas de lughe
a sa die ch'avreschit;
e in s'aera totta indeoràda,
su sole giaru e risulanu iffelchit
sos rajos de sa prima manzanàda ...
Tandho s'abe de nou in giru 'essit...
Titolo | Sa zente mia non drommit |
Sezione | Poesia Sarda Inedita |
Autore | Giovani Fiori |
Nome | |
Anno | 1967 |
Argomento | |
Descrizione | |
Lingua | |
Editore | Premio Ozieri |
Contributore | ATHENA SRL |
Tipo | |
Formato | |
Fonte | Premio Ozieri |
Relazione | Concorso Premio Ozieri 1967 |
Copertura | Logudoro, Sardegna Italia |
Diritti | Comune Ozieri, Premio Ozieri |
Analisi del Testo |