Di la parra, illa me colti,
c'è pultendi la pampana lu 'entu ...
Chi luttu e chi tristura! Chidda festa
di l'ua matura in mezu a la so fronda
abali è un sonniu guasi sminticatu.
Socu chici, pusatu,
un ventu fritu è intrendi illu me cori;
lu c'aggiu disiciatu
è divintendi cinnara, dulori.
Ed è piuendi. Cinnara è lu celi.
Illi me sintimenti li so 'eli
lacatu hani li neuli.
Solti, solti, palchì mi pari abà,
chici, illa ciminea, chi la me 'ita
sia una parra sfrunita?
E di dugna spiranza,
ill'ottugnu cussì di la me solti,
s'è pultendi la pampana lu 'entu?