L'hana mortu cantande
chin sa cantone in bucca.
E mil'han accattau
in s'andala predosa ocros a chelu
chin su fror'e sa morte
ispart'in fronte:
Fit solu chin su frittu
e chin sa malasorte;
chin su bentu mossendeli sos pilos
e in artu sa luna, pompiande.
Non l'hat cubau nemancu su dolu.
Sos mortores fughios
che umbra mala,
los hat bidos su ribu.
E sos seros de luna
cando dormin sas pedras
se sedet a contare in segretesa
a isteddos e nues
comente l'hana mortu.
Est ruttu chen'ischire d'aer viviu;
chen'ischire de morrere;
l'hana mortu cantande
chin sa cantone in bucca.