Pusàddu sòru sòru m'abbaìddu,
Mamma, lu to' ritràttu, e già mi pari
d'assé turràddu a pascha di Naddàri
in Sassari cand'éri vìba Tu.
Sunèndi so' a féltha li campàni
e, ribicchèndi a ribìccu maggiòri
m'ammentani a lu nolthru Sajvadòri
chi è naddu in d'una 'lthàdda di Bettrè.
Vèggu lu nascimèntu e lu Bambìnu
sòbr'a la bancarédda i lu cuzzòru
e a Te, piggiàdda a tòndu e in muccaròru
punendi la salthàina a friggì.
Eju, cun d'unu lumìnu, a una a una,
sogg'azzindéndi li canderaréddi
e ijpàglini bambàggi me' suréddi
danànzi a la pinnetta di Gesù.
Ill'aria v'è un fiàggu d'ozzimmànu,
d'aràru e di càrigga infurràdda
e di salthìzza sàldha ilthasgiunàdda
prònta pa' la fabàdda e pa' affittà.
Drènt'a la gàbbia v'è la galdheddìna
ribuldhurèndi che' d'abbrìri e maggiu
e, appiccàdda in fira a lu suràggiu,
e agabbèndi l'ùa a pabbassà.

Tu puru Mamma canti sottubòzzi
andèndi e turrèndi ì la cuzzìna,
dèndiddi bràsgia allégra e fazzindìna
cumènt'e tuttigànti l'àlthri dì...
E tuttu pàri véru, Mamma bèdda,
tuttu cument'e tandu di Naddàri
cand'éram'aunìddi tutt'umpàri
aissittènd'a Babbu pa' gulthà ...
Ma l'illusìoni è vana, Mamma cara,
chi' Tu séi sott'a un màjmaru, luntànu
e to' figlioru, incrucciuppìddu e canu
è fèndisi lu saccu pa' palthì...
Sòtt'a lu to' ritràttu v'è una làmpana
e un bucchettaréddu di fiori
e in còri méju réltha lu duròri
e una gana manna di pignì...