Informazioni sull'opera
SA TELA DE S'ISPERA
A nue ses andende isola mama
fizos tuos non tzessan de fuire
sinde bolan chircande s’avenire
inue su campare no est imbentu
e in terras lontanas an assentu
pro pracare de vida tzusta brama
si restana s’afrancan a sa bratza
gramunzande cun tediu su riscatu
sonnian de trabagliu unu cuntratu
suspirande c’arribet su futuru
chi lughe portet in tempus iscuru
ma non dat isperantzia sa piatza
si agatas trabagliu sol’innedda
totu su projetare est cosa vana
in chirca de s’impreu chi no ana
si passan in s’anneu totu vida
che desizos de fiuta proibida
in tripide pianghet sa padedda
chie movet sos ojos curre curre
non distinghet s’estiu da s’ierru
paret su paradisu ed est s’iferru
pompiande de chelu sas iscalas
com ente putzoneddu chene alas
chi volare diat cherrer a sa turre
domitas fraigadas chin sudore
abandonadas sun e mesu rutas
biddas ispopoladas paren grutas
sos zovanos lontanos a trabagliu
non cheren restare a s’isbaragliu
in s’isetu ‘e su tempus benidore
setias in contonada o giuminera
sas anzianas a lughes de luna
l’auguran una bida de fortuna
pro sos fiores bolados lontanu
pregan e cosin a rosariu in manu
sa tela de s’atesa e de s’ispera
carchi isposa, lacrimas in chizu
si cossolat chin d’una cantilena
suspirat a s’amore in terra anzena
e prestu nde lu sighit chin su fizu
Titolo | Sa Tela de s'ispera |
Sezione | Poesia Sarda Inedita |
Autore | Lorenzo Brandinu |
Nome | |
Anno | 2019 |
Argomento | |
Descrizione | |
Lingua | |
Editore | Premio Ozieri |
Contributore | ATHENA SRL |
Tipo | |
Formato | |
Fonte | Premio Ozieri |
Relazione | Concorso Premio Ozieri 2019 |
Copertura | Logudoro, Sardegna Italia |
Diritti | Comune Ozieri, Premio Ozieri |
Analisi del Testo |