Informazioni sull'opera
TESTO
SENDEGÀI B'AFILAMUS
Sa frascuza de s’òspile
ammarrànat su ventu
e frammas de arrebentu
iscazant in fumera
s’urtimu pupurùstu de sonnos
S’irvanèsset sa cantata
de prantarìthas e merulas
cando totus atrempamus
che corrancas arthuddatas
a unu riu de oras pragatas
Ma nois
cussentzias de veraniles
luego che allampiamus
sos chircos de s’atzile
uve
su tempus prumonathu
irgròmerat dies de iscunortu
e in una cròchita
s’illivrìnit che survile
sutzande s’avrèschita
dae sa janna de s’anima nostra...
In s’interi atitamus
su sole ch’est a istenios
in su chelu luzanu
como como risulanu
intre atzinnos de luchidore
Sendegai b’afilamus
che massajos de su cras
a ghetare sa poesia
in rallas e in athiles
po intregare tocheddos
e chimuzos de galania
a sos coros pitzinnos
SCHEDA DELL'OPERA
Titolo | Sendegài b'afilamus |
Sezione | Poesia Sarda Inedita |
Autore | Maria Teresa Rosu |
Nome | |
Anno | 2019 |
Argomento | |
Descrizione | |
Lingua | |
Editore | Premio Ozieri |
Contributore | ATHENA SRL |
Tipo | |
Formato | |
Fonte | Premio Ozieri |
Relazione | Concorso Premio Ozieri 2019 |
Copertura | Logudoro, Sardegna Italia |
Diritti | Comune Ozieri, Premio Ozieri |
Analisi del Testo |