LITERA A SU BIADU ‘E GIAJU

Giaju istimadu, già paritzos annos
a t'iscrier giutt’hapo sa idea
pro t’informare ‘e cust’epoca rea
ch’est a su mundu causende dannos.
De custu mundu chi a su fiore
de s’amistade hat siccu su tenaghe;
de custu mundu boidu de paghe,
de custu mundu istoigu de amore,
inue solu ispinas de rancore
bestin s’anima cun rantzig'umbraghe
chi oscuran sas dies de sa vida
e imbruttan s’andera ‘e s’esistentzia
ca solu ludu e lua in sa cuscientzia
b’hat in sa mente ‘e chie hat sa guida.
e in s’umanidade incrudelida
pesat madrighe ‘e odiu e violentzia.
Est beru chi sos tempos fin metzanos
sos ch’has bidu in s’antiga vida tua,
ca sos chi de sa barca fin in prua

fin pagos a haer su timone in manos,
ma nessi, ancora ‘e “valores umanos”

fit orizada cuss’epoca crua.

Ma como, cani giaju, custu mundu
isfidiadu e de sambene tintu,
a girare in perigulu est custrintu
prit’est feridu fintza in su profundu,
ca mare, chelu e terra tottu in tundu
cun minettas de morte l’hana chintu.
Fintzas s'iscientzia, chi no has
connottu,
cun sa natura a boltas est in chertu,
ca cussos trastes chi hat iscobertu
sun causende istragu e abbolottu
pro su cale hamus a piangher tottu
pro “bucos” e “piaes” chi han abbertu.
Giaju istimadu! “S'era ‘e su benessere”
custu tempus lu giaman, ma est
dannarzu,
ca sentz’anima e cun coro ‘e attarzu
tramas de morte est sighende a tèssere,
cun “arga” e “tua” e ... chena resèssere:
su mundu ‘e non bestire a muntonarzu.