CARRES DE FEMINA

Ma cantu mi sunt caras
sas carres tuas de fèmina
allumadoras de ganas
e contivizosas
de briones de amore.
Carres chi allatant frores
de misteru aprigu
e de ermosuras antigas
restadas in podèrios de vida
e illieradas prima ancora
chi sa grina primarza ‘e sa die
torreret respiru a su mundu.
Arcu paradu de asselenu tundu
sas donosas carres
disizadas in coro
e chircadas cun sa manu
dae sa fortza poderiosa de unu
carignu
chi si aberit durche
che cantu indeosadu de musa
crionzana.

Carres.
chi pedende amore amore dana
cando s’atopant
in filu ‘e pessamentu
e a cuncordu nde pesant su tempus
immerrendelu in galanas biadias.
Làgrima durche de late e poesia
sunt sas carres tuas amadas
oh amada mia
chi sempre apo chircadu
e chirco ancora
in sos traghizos de s’anima
in sas prigas de sa vida trampadora
in sos lentolos isfatos
apagados de nuscheles e suores
e in sos ammentos
lastimosos chi dolent
pro su tempus restadu a luna bassa
cando sa note
iscurigosa e muda
torrat sas soledades chi at su coro.