Che-i su carignu de unu frore

Arressa so in pintos de campuras
de sos disizos chi m’as semenadu
pro non bìdere su mundu lantadu
de traschias e mannas disauras,
cantu nos dofent cuddas criaduras
ch’ant connotu su tempus bortuladu …
Cun sos ojos s’abbengu m’as atzesu
che·i su bolu de sa mariposa
ch’inghìriat sa foza de sa rosa
e mi l’intendo su sàmbene presu
dae su mutu chi cantat atesu
un’istima cun boghe geniosa …
Nara·mi tando si balent fumeras
cando de fogu si pesant sas brigas
e paràulas non sunt prus amigas,
parent chi nuent finas sas aeras
e de crastos si prenent sas isperas
si prus non b’at amajos pro istigas …
Chena fune ligadu ses a mie
mancari apes un’upa timidu,
unu fatuzu nos at pirsighidu…
sa luna chirco e penso a tie
pro chi sa sorte messet cada die
trigu e gosu pro custu sentidu …
A manu tenta nos fiat mirende
un’isteddu risitu de lugore,
mi pariant carignos de fiore
cuddas ojadas de mele fuende
ch’intro su “selfie”, oe, sunt
drommende
cun sa majia bruta de mugore …
Su bisu torrat che frina de bentu,
a s’iscuja l’intendo tocheddare
in s’àmina si cheret intritzare…
coro arcanu nd’at malu apentu
cando in conca mòlinat s’ammentu,
de cuddu tou durche istimare…