Mama 'e dolore (pro Gianluca)

Solu
in letthòlos biancos de mudòre
su gurturju pettharju
m’a’ lassadu
su corpus affridadu
‘e ‘izu meu.
E de s’anzone meu
tottucantu su samben’
s’at sutzadu
custa carrèr’ abràda.
Ohi! Ohi! Ohi!
Sett’ispadas de dolore
intro ‘e custu coro sangradu!
Ahi! Ahi! Ahi!
Duos càntaros siccados
custos ocros meos
ch’an’ derremadu
sas urtimas istiddias buddidas!
Ma tue,
o ‘untanedda brisca ‘e su monte,
piedosa ti preco
mùrghemi
nobas bunnantes
làcrimas salidas
pro iffriscare
custu lizu dechidu e allizadu.
E bois,
janas attittadoras de Barbagia,
chi sar mamas ischides appenadas,
piedosas mi dade
sar brostas delicadas anninnias
pro chilliare custu billoreddu
de sas intragnas meas orfanadas.
Però bois,
lassadem’in peleas
de pichidos anneos cuccathàda
a l’attittare sola
cust ‘anzoneddu nidu:
lassadem’ eremada,
bos improro,
supra sa pred’abràda ‘e su jannile
chin su curruttu meu
a lu tejare sola
intro s’isciall’ispinosu ‘e su dolore.