Informazioni sull'opera

TESTO

In podere 'e su tempus

 

Isbàglio,
duncas so.
So lughe, so iscuru,
so veridade e fàula.
So abba e so siccagna,
so morte e sufferèntzia,
so gosu e so vida.
So che·i s’ùltima
foza ingroghida
in podere ‘e su ‘entu:
chi nd’apo a falare
isco ma non connosco
cando…
E ando a s’appalpu,
isconnóschidu e rebelle,
ando contrabbentu
abboju a custu tempus istragosu
chi su coro mi lantat
e m’innièddigat s’àmina.
Custu,
custu ebbia paret
siat su fadu
chi nos cunzedit
custu tempus fràzigu
chi l’at anzadu…
E deo,
ca nachi so poete,
sigo, comente faghent sos poetes,
a baulare a sa luna
e lasso
chi siat sa poesia,
chena ‘oghe, a ticchirriare
su dolu
de custu mundu feu.

SCHEDA DELL'OPERA
Titolo In podere 'e su tempus
SezionePoesia Sarda Inedita
Autore Antonello Bazzu
Nome 
Anno 2018
Argomento 
Descrizione 
Lingua 
EditorePremio Ozieri
ContributoreATHENA SRL
Tipo 
Formato 
FontePremio Ozieri
RelazioneConcorso Premio Ozieri 2018
CoperturaLogudoro, Sardegna Italia
DirittiComune Ozieri, Premio Ozieri
Analisi del Testo