I' la pàgina ghizza

Lu tempu è sculurendi
lu me’ cielu, sibistu ghjà l’incrinu
i’ la geometria via
di nervi arresa i’ la pàgina ghizza
di la fòglia spugliadda di certesi.
Una trama di nudda
accò l’ùltimu alenu di lu ventu
si la portarà in piùaru tra li piùari,
lassèndini in imprenta
l’ànima chi cumpari
un mumentu che l’azzareddi suspesi
i’ l’occhji di lugi ucchjttendi
da lu cori di li nèuli.
Fòglia iscruccadda i’ l’albori
di li mènduli, verdi
vistudda da lu soli, ghjumpidda
in ùrruli astariaddi di ghjnestri
a santificà l’incugna di l’istiu
cun tutti li trampi e l’illusioni,
imbriagga d’umori ribuddosi.
Fòglia abburadda cumenti lu tempu
straurdinàriu di la piccinnia
chi scubrimmu maravigliosu
solu candu è passaddu, palchì
accò lu semmu vivendi
emmu solu la premmusia di brusgiallu.
Vularìstia rifugghjì da la lògigga
di lu tempu, rifugghjì
a lu nudda darredu a la chisura,
s’è schiggiadda la fòglia
di l’anni mei, ninnèndisi a la frina
di la sera…