RECUIDA

Cando sas carres mazadas
recuen de pasu famidas,
non b'at trettu a divertidas
vagabundas curreladas!
Sas oras attraessadas
cun su sole pistiddosu
invitan a su reposu
d-ogni ruzu tzappadore,
chi cun rios de suore
passat sa vida terrena.
Pustis chi lagrima e pena
l'an assulcadu sos chizos,
in ojos mirat sos fizos,
bella, s'isposa ch'adorat.
Benit sa notte e s'indorat
de lughe santa, su tristu .
Li pedit a Gesu Cristu
una fortuna mazore,
e che drommit su dolore
cun su "Babbu Nostru" in laras!