AMIGANZIA

Da -e sa corriera 'e su tempus
medas amigos sun falados:
non sempre, a dogni frimmada,
un'ateru est pigadu, a sostituire
cuddu appenas faladu.
De totu cantos sun chi sos mancados
parizzos sun in mente giaittados
ca totu cantu su chi m'ana dadu
no est cosa chi podiat isvanire.
Su giogu 'e sa vida, lampizende,
pianas e lughidas at fattu
sas carrelas ue apo caminadu
cun su coro ispasimadu de amore,
e ogni olta chi so ruttu,
sempre, una manu de amigu
mi at pòrridu s'agiudu
a mi nde pesare . Amigos caros,
chi in s'ammentu meu ispassizades,
totu sezis bios in su coro.
De totu cuddos isparidos
unu nde 'ido, giaru e nettu,
in gropa a unu muletto abissinu,
chi, cando podiat, a puddiles ,
da-e Abba Garima tuccaiat, pro 'ennere
a m'accioppare a Adua.
A s'abbogiu fin pagas sas paraulas:
nos bastaiat un'isganzada 'e risu,
s'abbrazzu: e-i su coro cantaiat!
Oe, cando ando a campusantu
e mi frimmo addainanti de sa sua
fotografia, su coro mi s'istringhet!
Ma pro pagu, ca fàghet s'ammentu
pena e dolore appasigare.
E torro a bider Adua e-i sos montes
ch'in giru in giru li faghen corona,
e unu giovanu serzente, allegro e forte,
chi cun s'abbrazzu mi daiat su coro.