Informazioni sull'opera
TUI CHI SCIS...
Tui chi scis it'est
su sabòri ferosu de su mundu
e bufas in is arrastus de arrìus,
de mitzas arestis siccadas de soli,
o in sa proidura pudescia e umbrosa
de is fossus lassaus 'e is mortaius ...
Tui chi scis danzai
a sonu de tamburu tott'is ballus
a peis insanguentaus e pren' 'e musca,
ispollincu e pringiu de su 'entu
chi messat pebeddosas pestas,
ingranìas incungias po brentuxus ...
Tui chi scis cunfundi
sa nexi bianca cun s'arrosu,
e arris tzicchirriendi arena
in is dentis dicadas de su famini,
e non connoscis civraxudas mesas
si no is de su priogu apparicciadas ...
Tui chi scis prangi
is Iagrimas prus mudas
cun su pruìni de is domus isciusciadas,
sen' 'e circai sali po is liàgas ...
Tui chi scis pregai
pibionosus arrosarius 'e badas
a unu Deus sen ' 'e murrungius,
cun manus iscrelitadas
ch'istringint nieddas
carvarius de passioneras gruxis ...
Tui chi scis cantai
is prus disisperaus trumentus
cun ghitarras de isperas,
sen' 'e connosci is nodas o su tempus
chi passat aurtizzu is istàsonis ...
Tui chi scis perdonai
cun ogus de orfànas nottis,
is isteddus chi si fuint in atrus celus .. .
Tui chi scis cumprendi
ca de su propriu ludu ses fattu,
uguali a is atrus flllus 'e su mari
innui lièru si ddui depiat tuffai
unu celu illacanau de coloris.
| Titolo | Tui chi scis... |
| Sezione | Poesia |
| Autore | Giovanni Manconi |
| Nome | |
| Anno | 1994 |
| Argomento | |
| Descrizione | |
| Lingua | |
| Editore | Premio Ozieri |
| Contributore | ATHENA SRL |
| Tipo | |
| Formato | |
| Fonte | Premio Ozieri |
| Relazione | Concorso Premio Ozieri 1994 |
| Copertura | Logudoro, Sardegna Italia |
| Diritti | Comune Ozieri, Premio Ozieri |
| Analisi del Testo |