SU TEMPUS IT'EST?

Amigu narami:
su tempus it'est?
cando ti lassat pasidu e serenu
o cando malu che ispina areste
su coro punghet chi paret velenu?
Est s'alenu etemu e fadadu
de su sole chi naschet dogni die
pro custa vida ch ' andat e torrat
chena reposu? O sun ojos
galanos de luna ... e basos ...
chi no poto ismentigare?
O dulches - ranchidos ammentos
e lagrimas e suspiros ... cando ...
furridas abbas e lampos de fogu
ispramman sas undas drommidoras?
S'ischis su misteriu naramilu
e no mi lessas amigu in tristura
ca luego lu chelzo cantare
a dogni fiore a dogni criadura
a boghe manna in tottue
cantos minutos b'at in s'ora
cantas dies avrèschen in s'aera
in tempus de nue e in calura
contra sa zente ladra e trampadora
chi sa richesa at fatt'a fura
Lu canto a sos Fedales
chi inoghe sun ancora
e a cuddos chi no che sun pius
e chi dognora devimus ammentare
L'apo a cantare umpare a tie
notte e die, manu in sa manu,
pro chi in terra finet ogni abusu
e benzat s'ora bella
de unu Tempus nou innidu e sinzeru
che -i su Fizu de Nostra Signora
umpare a bois a girutundu
intr' 'e una pedra pien'e calore
chi 'olat in tundu alta in su chelu
a girasole in paghe cantende:
"Tempus nuraghes de pedras antigas
binchidos da-e tempus e dirrutos
e arvures e rundinas e fruttos
disizos cuntierras e fadigas
banzighende sun tres velas in mare
sa sorte sa morte e-i sa vida
una tanca 'e istellas fiorida
de pizzinnos chi cherene giocare
boghes de poesia sa zente manna
iscultaimis in nottes de istiu
luntanu brincait unu riu
ammajados in s'oru 'e sa gianna
dies de amarguras e isperas
unu sonniu una ninna nanna
e su 'entu chi muidat sa canna
in milli e chentumiza camineras
Tempus lizu in prestidu leadu
contivizadu cheres cun amore
in or' 'e gosu in or' 'e dolore
proite andas che fiore torradu
... a chie cun amore t'hat donadu .. . "