CHISTIONOS CUSSUMIDOS

Amos abbadu sos sentidos
cabulende a manu tenta
in su caminu
chi giughet a su chelu.
Una die in pasu
e una in cuntierra
sepultende pessos e bisos
cando bellos, cando feos.
A chentinaias de 'ortas
ti apo nadu:
"T'istimo, fintzas
a mi 'ettare terra in cara".
E tue donzi 'orta rispondias:
"Su matessi ti naro, chena duda".
E amos imbentadu
mizas de chistionos
pro trassare sas dies
semper cun amore.
E t'apo fattu pregontas
e mi as dadu sientzia
che cumpanza 'e fide
seberada in luna 'ona.
Est colende su tempus
e nois amos cussumidu
su chi amos imbentadu
e torramos a nou a murmutare
sos isciollorios murmutados .
Est a remuzare su mastigadu
ma, biad'a chie remuzat!