ICARU

Peri sas fozas de su crapione
sas umbras de sa notte
fuin allintzos puddericos de lughe.
S' àlinu 'e su 'entu
de un'erpilìu animat sas alas
e su bisu 'e su mundu
aperit in sas nues sa caminera :
in artu
sempere prus in artu
a furare unu semene 'e sole
chi addurchet sas avras d'ierru;
in artu
a cudd'ala 'e s'isprigu 'e su chelu
ue si mudat su manzanu
e morin sos ghermes de s'anima.
Su segretu 'e su tempus
in s'innida mente fiorit
e ruet su profeta 'e s'ispera
che puzone iscorau.
Chin sas fozas d'atonzu
lu collit su ludu 'e sa terra:
reverde ischintidda 'e vulcanu
tremende de vida
chircat brasa in mortùras chisinas .
Presoneri 'e sa memoria
in s'imbiligu d'antigas fromigarzos
chircat sa via de su trighinzu mannu
u'omines prus mannos siana meres;
Chircat cosmicas undas
chi l'intonen su cantigu 'e sa sorte:
ma rispondet sa morte
da -e su pudidore 'e sa pischina .
In sos pispisos de su crapione
puddericos de sole
fuin sos menettas de s'irmurruinada
chi carrarzat de urèsi
sos lagrimosos ojos de sa notte.