S'ARRELLOGIU

S'arrellogiu chi tengu ananti
sinnat is oras a pagu a pagu.
Is minutus invecis, currint lestrus,
bantaxeris e prepotentis,
scarraffiendi su muru forti de su tempus.
Su pruini fini chi nd'arruit:
granu di arena luxenti,
riflettint, in is tantis faccis,
scenas de vida.
Sa tua accant 'e sa mia.
Biu sa tua, biada comente una pregadoria,
chi si pesat in artu,
pighendindi is coloris
in is medas faccis
de is cristallus di arena.
C'est unu colori po d'ogna momentu
de biadesa chi tui m'has donau.
In dognunu de cussus momentus,
hapu intendiu bia
sa stima chi tenis po mei,
ind'un'impari de smuscius circaus
chiabbruxant
in d'una bella fantasia di amori.