Informazioni sull'opera
E MI TOCCA A ASSE' PUETU
E puetu mi tocca a asse'
pa ' abbizammi chi la frina di la sera
lu doru e' ifrabbinendi in dugna loggu,
pa' intindi' la risa chi lu sori
ipagli i' l'aria
candu a ischaccagli brusgia a mezzudi'
i' l'agliora ricca di sudori
e pa' pigni ' umpari
a ca' e' sanguroni
pa' li raffi d'ugni iffidiaddi?
E no l'intendu
i' l'ari di lu ventu la tristhura
d'ommini ivviaddi
cu' lu cori allizaddu da la marasorthi,
li denti arruddaddi di virenu
e l'occi anniuraddi d'odiu e di rancori?
E tocca a asse' puetu
pa' siria' la fammi
ch'e' disthrugendi ca no ha un mossu di pani
e pa' intindi l'istheniu ch'e' frazendi
lu mondu a poggu a poggu
cun punti d'aggu chena firu
e pa' vide' l'archu paraddu
ch'imprummittia chintari di prata,
diaddi li lintori
e fiori prafumaddi d'unisthai?
E no si po' vibi' chena puisia,
di' pa' di',
la viriddai di la vidda,
cun durori e peni e risa
e una giunta di luna
in duna notti bugiosa, chena isthelli?
E tocca a asse' puetu
pa' inguddi' l'isthranguglioni
ranziggu di ca' t'affendi
candu l'isthrigni la manu
i' l'intregu di l'anima sinzera?
E tocca a asse' puetu pa' asse' ommu?
Titolo | E mi tocca a asse' puetu |
Sezione | Poesia |
Autore | Nino Fois |
Nome | |
Anno | 1992 |
Argomento | |
Descrizione | |
Lingua | |
Editore | Premio Ozieri |
Contributore | ATHENA SRL |
Tipo | |
Formato | |
Fonte | Premio Ozieri |
Relazione | Concorso Premio Ozieri 1992 |
Copertura | Logudoro, Sardegna Italia |
Diritti | Comune Ozieri, Premio Ozieri |
Analisi del Testo |