In caburi suriani a primabera
lu fiagu di lu mucciu è cussì densu
chi mi firi li pinni di lu nasu
e mi curri i lu sangu:
grtdu di Sardhigna chi s'isceda .
Althu
di zima in zima cu lu ventu
l'asthori caimu gioga a fa li cecci
e pali baddi
è tutt'un riu di grogu chi s'ipagli.
Li graniti ischuipidi da lu tempu
luzicheggian'i l'aria traiparenti,
la pimpinella gioga i li furttani
cun gutteggi di prata, di cristhallu.
Luntanu, in basciu, l'ondi di lu mari
s'iscioglini in brividi d'isciuma.
Da li monti
sunaiori di peguri e prufumu d'ipigura.
Da li grutti minori di la rocca
fara una fada cu li peri nieddi
cun l'occi beddi e bocca di cariasgia
paschurendi una nui di barabatturi.
Lu tempu abani è feimu
e lu mè cori pessu drent'a un sonniu:
o Terra arrida, forthi, drummicciosa
Tu sei tuttu l'amori d'una vida.