AMAMMAI

Circu debadas
in sa cara tua
is trempas de arrosa,
is ogus de amistanzia,
is lavras de sinceridadi
chi hiat fastiggiau
maccu e perdiu babbai.
Su tempus,
che bentu tirriosu,
t'hat ispollau de dogna cuncordia.
Accuncuiada
in s'oru 'e sa forredda
sighis cun sa menti
oras impressìdas
de spassiu e de fatiga,
imprassidus disigiosus,
basidus donaus a fura.
Pimpirinas de vida
tenint a lestru impari cun su fogu
tebidendidì su coru,
ma luegu e totu
s'indi andat
cinciddendi che frarìa.
E ... che pipia scinizzosa
fattu fattu
attendias is manus,
nuosas che ollastu,
in circa de carìgnas.