SU VIAGGIU FATALI

Deu, candu calant is umbras chi cùant
ogna luxi ch'inserrat su coru
in is pippìas de s'animu fadiàu
e in su traballu intensu 'e su meri,
intendu sa boxi studada de su sulidu tuu
chi sulàda is didus gelaus
in is dis meda fridas de gennaxu,
candu su bentu furiosu tiràda
in is cambus spollaus de sa folla.
Imoi passu mudu e solu andendi in circa
de una traccia: s'arrastu in sa banchina
de cussu mari asulu,
tengu is origas prontas a iscurtai
sa sirena 'e sa navi in cussu portu
po torrai a sa terra prus bramada.
In mesu is boxis e sa ciacciarredda
de is chi partinti, is manus agitendi
po saludai cummovius cussa terra.
E mi pari' de biri cun sa cara groga
una picciocca cun is pilus isciottus
chi ddi movìa su bentu,
e de is ogus bessianta ciciddas
castiendi s'asulu sene fini,
forzis fiat s'addiu sene sciri
ca cussu fiat s'ultimu saludu
de u:g.u viaggiu chi s'est interrumpiu
a pagu tretu 'e su portu fatali.
Sa speranza allupada cun sa genti
in d'una pampa 'e fogu prena 'e fumu,
e clamoris e boxis disisperadas
in sa trappula trista de sa morti
de suncuna arribada.
Agoa silenziu, asseliu de tumba,
in sa notti sa fracca si giogada
e luxìanta is undas de su mari
agguantendi su pesu 'e su traghettu
furriau a baullu ...
Passu ancora cittiu, castiendi
is caus biancus chi battinti is alas
cun bolidus istraccus, messaggeris de paxi
ei su bentu frusiat unu requiem!