A BORTAS
MI PARET...


A bortas
mi paret...
chi su cipressiu
mulmutat consizos
e bischiliat in s'umbra

mascarada dae su 'entu
chi ferret a lebiu a lebiu
sas frundas
chi nde tremen a penas.

E... si at a essere
unu pensamentu de cunsolu
cando su tamariciu fioridu
drinnit ternurosu e dulche
in su sole de su 'eranu?

E cando s'acassia aciotada
dae su 'entu fuliosu
s'alleventat
pro su dolore istremorosu
chi l'ispantamat
cannujada dae s'apantaviu

fortzis est paghende
una pena de innotzente?

A bortas... sutzedit
chi una nue de undas
de nuscos cuados
de amore ispainadu
afusadu
dae su nieddore de s'asfartu
mi carignat

A bortas... mi paret
chi no so solu.
ca sa natura
oriolada e amorosa
mi bantzigat
annariende
de s'afajare meu

istudiosa
de comnente un'omine
fuiditu
at a essere
immortale.


Mario Nurchis
Napoli 25-07-1942
(genitori sardi)
S.S. 291 12/a
07100 Sassari
tel. 079 269344