Informazioni sull'opera

TESTO


...E mi naran Balente...

So' sichinde sas dies impinnadas
fughias a su ritmu 'e su tempus

si mi poden aperrer
s'aghidu 'e s'accunnortu 'e sa resone.

...E mi naran balente...

In sas padules de sos sentimentos

ube affungan fartadas sas paràgulas
e sas marranìas allughen

pistichinzosos pessos
affrebbaos de dudas
si m'imberghen che zecos
pizu-pizu sa làcana 'e s'odiu...
In sas benas su sàmbene mi curret
mimulande su tempus de s'ispica
da-e manos nodosas carinnada.

Chin d'una rosa 'e ispinas in su coro...

so' caminande a toppu
a passu 'e luna

in s'andala 'e sos pessos ispurpaos
da-e anticas lunàdicas mimòrias...
Ma non timo s'ispreu 'e sa notte
mancu sos tìrrios de sa ghiddighìa...

...E mi naran balente...

Che paliazzu 'e umbra

prango e ballo e rido (ca so' bibu):
pro sas prumissas chi non ponen granu

pro sa luche 'e su manzanu
chi fittianu miro
accoconau

da-e s'intranna 'e mama
in bucca 'e furru
cochende pane anzenu... a brente franca.

...E mi naran balente...

Su coro meu 'e terra arragaddada
poeta-paliazzu
pranghet ridet ...e cantat

a boche 'e carestia

sa cantone 'e su furru... e de su ribu...
in d'unu ballu 'e ispicas rujas
nuscosas de sudores... e disizos...

Si custa est balentia:
chin su coro intrizziu 'e ispinas

hap'a esser abberu unu Balente...


SCHEDA DELL'OPERA
Titolo ...E MI NARAN BALENTE...
Sezione  
Autore Jubanne Piga
Nome B20040072
Anno 2004 
Argomento  
Descrizione  
Lingua  
Editore Premio Ozieri
Contributore TecnoService
Tipo  
Formato  
Fonte Premio Ozieri
Relazione Concorso Premio Ozieri 2004 
Copertura Italia, Sardegna, Logudoro
Diritti Comune di Ozieri - Premio Ozieri
Analisi del Testo