HAMUS PERDIU SU SOLE
(Sos battor orfaneddos)

S'anima nostra est artis artis
a cada moghia 'e sisìa.
Su denotte
su bentu 'e sos sonnios
nos toccheddat sa janna 'e su coro
tancada a sos umores de su mundu
e nois
hamus perdiu sa crai 'e su risittu.
Sos puzones
non tessen prus manzanos de lentore
ricamaos de boches de alligna
in s'arbore dirruttu
de sos disizos nostros isfozios
cantan a sa tristìa
chene alas bolande a bolu curzu
chenz'ischire a ube ferrer
ma non chircan pistazas de piedu
m sa manu parada.
S'eliche de sa pratta 'e sa dommo
de sa Corra Cherbina
est a brazzos ispartos
che anticu profeta 'e dinnidade
badiande s'umbra tua
supra s'istrada bòdia muccoràndesi.
Hamus perdiu su sole
l'hana chircau in medas
nemmos l'hat accatau
hamus perdiu su sole unu manzanu.
Non cherimus cocone
nen pinzicheddos nobos
babbu meu
Cherimus pezzi a tibe
chi torres a nos tenner sos beranos
fughios ispramaos
che puddericos rudes
da e s'ospile 'e su coro incaninde p:izzinnu.
Ma chie Deus meu
chie nos hat a dare si non Tue
su chi andamus pedinde?
S'anima nostra est artis artis
Cherimus imparare a precare...