SU CHISCIU 'E SA MAJIA

Fiamas de sole brujan
in su chisciu 'e sa vida
e-i su terrore sacru ballat
in boleos de majìa.
Non traesses sas intragnas fiittas
cun su fiore diligu 'e s'ispera,
est muda sa 'oghe sua
si giampas su riu 'e s'olvidu
e upas de piumu sizin
sos fundales de sa mente .
Balla in su sole!
Isfaghedi in su ritu
intr' 'e su chisciu azzesu!
Balla in brazzos a sas furias
finz'a tantu chi 'e fìama
tue non benis
e in sa lughe alva
de s'istrema 'idea
a s'isteddu tou non torras
a isolver sas umbras
de su reposu vanu.