CANZONA DI RIU

Ali palduti di lu pinsamentu...
Eran'ali di falcu e di baldanza.
Vill'aìa dati pa ' bulà siguri
in tempu stenu e ciurrati di 'entu .
Lu pinsamentu m'è turratu frantu,
ali calatu cun firuti mali,
viritai d'agattà chena spiranza
dananzi a un misteru chena scampu.
Tutt'è cunfusu in umbra di fumaccia
lu ch'è illa 'ita e altu che illusioni
no è lu chi si mustra in vesti boni.
Eppuru mi suppesa la passioni,
a volti, tutta in sonniu chena nei.
Canzona no accolta d'unu riu
o ghjcu d'una musiga di mari
agghju illu cori e ghjemi di parauli
lustri e no lustri in risi dicci e chjari.
La 'iritai è in chista di lu riu
andera chena frenu di li spandi,
è forsi in chist'aspettu di disvìu:
passa chena risettu e a nisciuna
dummanda mea mai no irrispondi.