FERIDAS DE ATTUNZU

Ingroghidos...
albores de attunzu 'intrant
in coro a isfozidas
camineras de suerzos;
ferint s'anima attitadora
de s'aèra: marna proighinosa
in umbras mudas
ch'estint de trementu
montijos e ispentumos.
Tramposu...
interinare de attunzu
isparghet rtues minettosas
subra sas ultimas
lughes de su sero.
Tremulant - ispantadas -
lagrimas de lentore
in sos passos retentos;
s'istudant ammentos murgherados
de ispazios biaittos
e seneghe tempus
iscobiat segretos pensamentos
addolimados...
da-e ticchirrios repìtidos.
Custu tempus, bido
caminare in murru chelu,
trazadu - cun passu tronosu -
da-e sos bentos muilantes.
Est tando chi 'eo:
nò mi lasso destruire
da-e sas pores inimigas
ca mi sustenit recumpensa
pro cumbattas fittianas;
isperas in signales bios
costoidos in sa dormida terra
de custu meu
ingurdu, connòschidu attunzu.
Mi 'asant signales maduros
brottados in sinu a disizos d'eranu,
ch'hant abberrer - pro semper -
sas pibiristas immortales...