E SA VIDA...

Iscurrizada 'e isteddos
brasieri 'e sole.
E sa vida banzigat
che cuss'unda
chi s'iscazat in sas roccas
e t'isvanit
in s'isprigu biaittu
de unu chelu isteddadu.
Un'atera vida
un'atera unda la sighit.
Iscurrizada 'e isteddos
brasieri 'e sole.
E sa vida est
che cussu fiore
chi creschet cara a lughe
in d'unu fogarone 'e colores
pro esser rugadu
e allizare a su sole.
Un'atera vida
un'ateru 'eranu hat a fiorire.
59
Forsis est solu unu sonniu in su sonniu
cando si cret de esistere
conchistados da-e un'abbolottu 'e sentidos.
Arrodiados da-e su vivere
totu s'isculpit in ammentos
e che in d'unu laberintu
si torrat a su matessi zassu
pro appeutare sas proprias imprentas.
Chenz'amparu e zarros
si curret contr'a bentu
a pessighire sa felizidade
arenadu e isperdidu
onz'unu vivit cunzadu
in d'un'irguttu 'e amore
meravizadu
de sa die ch'irmurinat
e faeddende 'e deris.
Iscurrizada 'e pruere
brasi eri 'e chisina.