SU PANE NOU

In d'unu bicculeddu 'e 'agantiu,
de su fertile Nurcoro incantadu,
babbu semenaiat su trighittu
chi 'eniat a urtimos de maiu.
E, lestru, l'andaiat a messare
appenas ingranidu,
pro lu fagher siccare in su restrugu.
Poi lu ligaiat a mannugru
pro lu jugher a s'umbra 'e una figu
e chin su mazu antigu
lu mazaimus pro lu triulare.
Mamma mia fit pronta a bentulare
e poi, 'ene purgadu,
lu jughiat in presse a su molinu.
E cµmassende sa farina noa,
cuntenta mamma mia,
cantaiat serena una cantone
chi fit sa pius bella preghiera
fatta de fronte a unu furru alluttu.
Daenos pane, Deus
pregaiat cantende mamma mia,
daenos nessi pane in abbundansia
pro allevare custa piseddina.
Gai preghende a Deus sa farina
diventaiat pane .
E mamma infurraiat sa cogone
fattendeli sa rughe, a modu sou,
beneighende. E de su pane nou
su profumu curriat in sa via
a rinnovare in totu s'isperansia.