DEU PURU
Deu puru: trumbitteri de stima e di amori,
comente is andadoris de una borta,
cun sa bertula a coddu e s'udri a chinzu
andu peri is bias de su mundu, cantendu
e intreghendu is canzonis a su bentu
po chi ddas portit a sa parti chi bolit.
Deu puru andu de mizza in mizza po buffai,
in s'umbra sempiri birdi chi confortat,
s'aqua frisca chi zampillat e ristorat.
Andu a circai fradis: po sparziri cun issus,
aundi is mizzas sunt abbarradas siccas,
s'aqua de s'udri miu limpia e crara
chi donat cum bonesa senza studa, consolu
e biadesas disigiadas de corus insidìus.
Deu puru torru a sa funtana sempiri bia
de su «Cantaru»; aundi, aspettant is maistus
de s'arti bella prus antiga de s'omini,
chi m'hanti cumbidau a s'attoppu di hoi
po benedixiri sa bondadi de sa fatìga .
chi portu in bertula, po sa spadalia intre
fradis avvesus a s'incantu de is sonus.
E ddoi torru currendu: de mengianu chizzi,
innantis chi su soli si pesit e calentit
e sa basca annappit, cun is fumus de s'airi,
s'orizzonti limpiu e luxenti chi dda 'ngiriat.
E innì mi sezzu; cun su com unfrau de prexu,
in s'abettu chi s'aqua sanidosa ch'issa donat
mi torrit sidi, comente candu buffu in s'udri miu
sempiri prenu de cròculus ispantosus.