Premio OzieriPremio Ozieri di Letteratura Sarda 
TESTO


Non nde cheret s’intesa
sa pinna mia, muda
già timinde sas umbras serentinas
e isfadosas frinas
chi, a sa carre nuda
de s’anima, nd’ischidan ogni ofesa.
“Ite cheres ch’iscria”
Paret nende aghejada,
“Solu fastizos tue mi presentas
e ogni pena assentas
nendemi ch’est passada
e cheres chi la ponza in poesia.
Poi, luego atrogas
chi sun isfidiadas,
bias e fortes custas penas tuas,
chi mudu-mudu cuas
manch’esseran furadas,
e fritas, a disora nde las bogas.

Cantas notes izende
tue e deo a sa sola
sepre in briga pro rimas e pidinos,
istracos, che runzinos
giobados in sa mola:
su chilciu chen’’essida sempre
andende”.
A ite a bi brigare,
mancan fortzas e briu
e issa tenet tota sa rejone,
ma est pro passione
e ca m’intendo ’iu
chi sigo in custu iscriere e pensare.
Como la lasso in pasu
tantu non nd’ogo atzola,
chi drommat issa e deo m’asselene,
nos at a fagher bene:
deo solu, issa sola
ma sempre umpare finas a s’ocasu.

SCHEDA DELL'OPERA
Titolo SA BRIGA
Sezione Poesia Sarda Inedita
Autore Franco Piga
Nome  
Anno 2021
Argomento  
Descrizione  
Lingua  
Editore Premio Ozieri
Contributore ATHENA SRL
Tipo  
Formato  
Fonte Premio Ozieri
Relazione Concorso Premio Ozieri 2021
Copertura Logudoro, Sardegna Italia
Diritti Comune Ozieri, Premio Ozieri
Analisi del Testo  
Torna all'inizio del contenuto