UNA ROSA E UNA CANDELA

Tia cherrere
una candela alluta
pro iscrarire su chizone 'e sa notte
istrasinada
lenta e chena sonnu.

Una petza inutile...
cussa camisola 'e rasu
posta in sa cradrea boida
a cuare su mancamentu tou.

Appo galu sas ganas antigas
chi tue m'as lassadu.
e unu pinzellu
immerradu in fantasias arestes.
E tepp'aere temperas de terra
nottes caentes de luna paschende
e diligos carignos pro pintare
sas ermosuras de su corpus tou
allutu che una rosa
a primu 'eranu
chi nde torrat cantende
tottas sas passiones de s'ierru.

Ma como est tardu
corittu meu!
Tardu
pro sas retrogas
e-i sas allegas
de sos contos nostros
chi no torrant.
E no podent torrare mai
in custa incumprida e inutile pintura.

Impestantu
si est pesadu su entu.
Sa candela si est istudada
e deo so brusiende su pinzellu
prò allumare sa vista
in sas longarias de sa notte andende.
A sa chirca 'e sa trama nostra
perdida e mai
de su tottu irmentigada.



Nome: Stefano Flore
Luogo e data di nascita: Anela (SS)
31/03/1943
Residenza: Via G. Matta
n.7 - 07100 Sassari
Tel. 079.298155