TORRAT BERANU

Candho torrat cantendhe su eranu
cantat innos de gloria e amore
de sa natura, su cantu galanu:

L'intendhet su massagiu , supastore,
daghi tottu su nie ndhest caladu
e de s'ilgerru passadu rigore:

Torran cun'issu a s'abandhonadu
nidu, sas innozentos rundhinellas,
chi andhadas che fin s'annu passadu;

Torrana puru modestas e bellas,
accopiadas de sinzeru amore,
sas caras e amadas turturellas.

Beranu Santu: Santu produtore
chi movet tottacanta sa natura
po li ogare a campu ogni fiore:

Sas alvures si estin de ildura
ch'est paradisu de ogni puzzone,
chi si faghet su nidu in sa chisura:

Muen sas abes, muet su muscone,
cantat sa Filumena primmaria,
belat s'alveghe, giamendhe s'anzone .

Totta custa ada gerachia
de insettos piantas e fiores
e animales de ogni zenia,

Cantan'à su eranu sos amores
chi hat battidu cun tantiallegria
e po cussu li faghen sos onores.

Gai,unidos, tottu in cumpagnia,
cantan'in coro, su cantu galanu
chi est tottu unu mare é poesia

Candho torrat a benner su eranu.

GIOVANNI MARIA FARA.

Pozzomaggiore