SU MODU E NONNA MIA

Cando fit zovanedda nonna mia,
Teniat in su campu,unu cunzadu.
Contivizzosa,pius de una ia,
A tundu de alvureddas l'hat prantadu.

In ierros de nie e de iddia
No lu lasseit chena compudadu.
no fit pazzosa in trastos de pannia
Essiad'isconfusa e a pe Iadu

Com'est manna,ma sentit su trascuru
De tanta zoventude,pritiosa,
Ch'istat rundende,a oras de iscuru.

Ordiminzende pro illuminzare
Fogu, su chi dietruet ogni cosa,
Eppuru,viven chena trabagliare.


CHIRCHENDE SA POESIA,

Chirchende isto a tie, "Poesia"
Che fidu amante chi chircat s'amore.
Tue ses s'arte e meritu mazore.
In musicalidade e armonia

Isplendente de lughidu candore
Divinu donu godis tue ebbia.
Chie de te connoschet su valore,
Ti giamat in tristura e allegria.

In sas iscolas ti tenen ammiru
Tottu sos c'han cumpresu sa grandesa
Ti braman fin'a sultimu suspiru.

Eo m'affanno chirchend'onz'ora
Mancari sia a cariga,d'ezzesa;
No mi arreo a ti chircare ancora.


SEMENEMUS BONU SEMENE

Cun tegus caru frade de amore
Cheria calch'istante arrejonare
Pro ti narrer chi deves seberare
Su semen chi usamus pro su trigu -
Isparghemus sa oghe a onz'amigu
E a chie interessat su laore,

Cantos e cantos fora e resone
Faghen a dortu custa
facultade. Pro tontesa sa mala calidade,
A punzos prenos semenan in terra
Pro cussu totta rugès e a perra
Tenimus su produttu ogn'istajone.

Est mannu torracontu meu e tou
A semenare semenzas frutosas;
Nettas chen'arraborene pedrosas
Chi no ingaben debadas terrinu;
Fattende gai tenimus continu
Manadas e mannas a su prou.

Caru non ti trascures un'istante,
Cura sas calidades de su ettu.
Prena sos sulcos de semene nettu
E bides poi nascher foza e canna,
Cun s'ispiga in mesu manna manna
In colore de oro e diamante.

Cando no hat su semene difettu
Naschit e creschet bene,ispiga e ranu.
Siat in terra a costa o in pianu
No perit pro burrascas de s'annada;
Prite sa linfa a geniu li dada
Su suzzu sou,a filu erettu

Su cumpanzu sighi a bonu coro
Su consIzu,c'has'a tennes rendimentu.
Segura ti consolas pius cuntentu
Cando in custu modu has semenanu,
Su ranu preferidu de s'aradu
Maduru des collire in saccos d'oro.