Sos Poàtas

Segnòre

peldona... sos poètas
s'an solu cantùtzadu
pro imannare s'ispera
cun rebùddos d'amore
a sa pinna affidende
filontzanas de paghe


Sos poètas:
non cheren cùmbidos
in mesas de dolu
ca
lis pesan in s'anima
libertades grassàdas
cun odios e sàmbene.

Sos poètas:
in oras de apprètu
an desizos crobados
chi dzenia 'e Abramu
in sa terra connòta
costoan sas raighinas
de funguta mimoria
cun diosas avreschidas
carignadas dae frina
e nuscore'e mare.

Sos poètas
no pasàna
ma lampan a bentos
peràulas inganniòsas
e ischegana cuddas
chi s'anima pùnghene.
S'istoria no s'iscriet
cun sàmbene e lottas

ma cun oberas bonas
e suore.
Tue puru.. o Segnòre
ses semper Poeta?