sos NURAGHES

Iscuru cussu populu qu'est privu
de calch'historia bella e gloriosa,
e qui no laxat opera pretiosa
mustrare cantu fit activu.

Ma sa Sardigna, Mastra de prodesa,
in gherra e in paghe, podet affirmare
qui no s ' est facta mai superare
in proas de valore e de grandesa.

Dogn'invasore hat pagadu cara
sa prepotentia barbara inzivile
contra su sardu poveru foghile,
sempre difesu cum bravura rara.

Ma sos qu'appretio ' e Te, subra 'ogni cosa,
Sardigna amada, sunt custos ammentos...
sunt sos insignes sacros Monumentos,
sunt sos Nuraghes de s'Era famosa!

Ah! bellas Turres sardas,fraigadas
chena calchina, summ'abilidade,
cando in su mundu ,dae s'humanidade
tanas e gruttas s '' idiant abitadas.

Minores, mannas, sunt in dogni logu,
e sunt noemiza sos annos passados,
dae cussos tempos qui funt adorados
su Sole ei s'Abba, paris cum su Fogu!

Cal trabagliu !cale perfectione!
Opera eterna, abberu soberana,
de cuss 'antiga razza forte •
ses sa pius manna fervid'espressione

Ma nudda nos has nadu de seguru,
puru si sos sapientes hant chircadu
de fagher lughe in totu su passadu..
Nuraghe ses restadu,mudu e oscuru!

Mbè! pagu importat sa curiosidade,
bastat ad mie ischire cum zertesa
qui testimonzos sunt de nobilesa
de sa Natione sarda in cuss'edade.

Cussa Natione sarda indipendente,
mama de fizos fortes e geniales
qui nos laxesint signos immortales
d'un'arte rara,preju de sa mente!

Sardos de como!...frades istimados!...
chircamos tot ' umpare d'operare
pro sa Sardigna ricca in terra e in mare,
comente Nuraghesos inspirados!

Custu dovere sacru nos hant dadu,
coment' ambida e digna eredidade,
potat sa nostra forte voluntade
sighire e superare ' ogni passadu!