sòri...immezu a la genti


Un viurìnu è sunendi i' lu Casthèddu
una fémmina badda un baddu isthranu
cantendi una canzona ammaliadòra
una canzoni d'amori

Lu mari si z'ischudi murrugnèndi
contr'a la rocca antigga di mili'anni
e la musigga sona lébia assai
soni dozzi d'amori

Pusaddi i' la pidrìssa semmu noi
sori
immezu a la genti
soru noi dui
...sugnendi

Lu zeru piègn' isthèlli chi farendi
s'ifrabbinèggiani
in curo' di pratta
i' lu mari incantaddu

E... sori isthemmu noi
'mmezu a la genti
soru noi dui
...sugnendi

Lu cantu di la femmina zi bora
lébiu
i'lu zéru
un cantu di maglìa
ischimùzu di chìggura già pessu
i' la notti ammacchiadda
Notti d'isthelli
i' lu zéru d'Aosthu

Zirchend'affiagnu tu t'isthrigni a me
dumandendimi un basgiu
ed un carignu
i' la notti sirena

E sori isthemmu noi
'mmezu a la genti
soru noi dui
...sugnendi

Lu viurinu ha finiddu di sunà
i' la tarràzza in punta di Casthèddu
la femmina s'incina a ringrazià
e fini la maglìa di la canzona
di chissu baddu isthranu
più siriaddu

baddu d'amori
baddaddu pa noi dui
ch'isthemmu sori
...immezu a tanta genti
soru noi dui
...sugnendi