Si so destinadu

Su craru de su sole chi morit
m'arrivat
dae palas
a su lettu
inue mi gasto cun terrore
sos urtimos alinos de bida.

Est iscuru cando sa morte niedda
s'allumat in sa cara chena carre
e sa frollana
ch'astringhet
in sas manos nodosas che rosariu

mandat rajos de luche.

A dispetu de sos isteddos
pantumas m'aberin sa janna

chi tirriat orchidos de dolore
che istrias pilisadas in sas roccas.

Como so solu cun sa morte chi ridet
cun sas dentes biancas che su nie
e caminat ballande
pro mene

s'urtimu ballu tundu cun sas umbras.

In zoventura
cando sos poderios
fin fortes de s'olvidu in sos amores

pensaia a sa morte che unda luntana
isfoettande ateros iscoglios.

Ma su samben imbetzat in sas benas

in sas benas de totus e in sas mias.

M'ido in s'ispricu

umbrosa prata in su muru

che pantuma consumida

totu ocros allampanados
e disizosa de luche.

Morte si as lassadu viver su dolore
chi m'at distruidu mermos e sentidu,
lassami su tempus de pensare
si apo lassadu felitzes ammentos
e de ischire si so destinadu
de aer in sa losa
una lapide umbrosa,
chena iscritta
.


Larentu Pusceddu
Cas. Post. Chiusa
105
08029 Siniscola -
Cell. 338/2815050