SA DOMIXEDDA AUNDI SEU NASCIA


Ti conoscemu vetti
In 1is contus biadus
De mamma mia bella
In su coru serrada ti stringemu
Sonnendi su momentu felici
De ti porri' ammirai.

Ti biemu casteddu
Incantau e posau
In su cuccuru birdi
De frisca fantasia.
In su giardinu froriu
Intrecciamu coronas de rosas
Po m 'ind 'inghirlandai.

M'intendemu bellissima
Castellana biunda
In abettu costanti
De princip'amorau
Cavalchendi cuaddu biancu...

Pustis tant'abettai
Seu renesci'a torrai
A sa domu stimada
Ansiosa de ci lompi'
Circamu de bolai
In s'arziadedda curza...

Ma candu s'omineddu
Chi m'hiat accumpangiau
M'ammostrat tanti perdas
Sdorroocadas e birdis
Po su cappedd"e muru
Cumprendu d'essi' lompia
Cun immensu ritardu...

Hapu castiau pensosa
cun coru lagrimosu
Cussa grandu perdera
Abbandonad'a s'aria
A s'aqua e a su bentu:

Avanzu ruinadu
De casteddu incantau.


Evelina Garau Murranca
Nata a Masullas (Or) il 10.02.1918
Res. in Cagliari Via Maddalena
56
070.659679