Sa bida est gai

Est beru
iscurta
sa bida est gai

pagu meda ti dat
mudesa
a sas preguntas
s'oriolu de ischire
est connota pretesa tua macca.
A s'accabbu
e innantis
atzottadas

medas e non pagas

ti porrit indebadas.
Est frorida
àrbure beranile

de carcas losanas fozas chìbbera

de durches licanzos frùtures
in su càlidu estiu 'arriada

in su tuncuniu atonzu ispilida

in s'arrennegu berrile infrittorida.
Arbure chi non cussentit abbigu

cai fàmene e sidis non ti catzat.
Sa bida est gai
est beru

ma si tue
guvardu

istraccu de innùtiles preguntas

ti cuntentas e no abbaidas ebbia
sas nues nieddas
chi cuguzant sa bòvida 'e su chelu

ma miras peri e iscurtas
s'àlidu poderosu
de s'àghera ispallattada
de lùghidos isteddos ammuntada

si nares tenes e ogos prò intennere
de sos frores su nuscu e sos colores

si de su pitzinnu innotzente
in ogos e laras su risittu
ammammalucadu miras

si ischis iscurtare
su pasidu murmuttu de unu riu
chi priu falat a mare

s'arcanu mudori 'e su padente

de piaghere bellesa e paghe
su coro ti si aunnat e ti paret
chi sa bida si podet peri amare.


Monterra Mario c/o Angelo Bellinzas
via G.Re
90 - 10146 Torino
Tel.:011/7793503