Informazioni sull'opera
EO L'APO CONNOTA
Eo l'apo connota!
Una bella segnora.
Cando
galu minores
da sa gherra
abeffados
e ruttos
de su fadigu
ispozos
de dignidade umana 'e cada bene..
porrinde-nos sa manu
e da bermes chi fimis
omines! Nos at fattu.
Ma poi 'e tantas lunas
lugorosas e giaras
est torradu s'iscuru.
Omines guturrudos
che lupos inganidos
chi s'insor'e s'anzen'an ingullidu
in biddas e cuiles
padentes e desertos
in piattas
cresias e iscolas
de samben innozzente
sas manos e sa cara s'an infustu.
E sa bella segnora
che bagassa impestada
istrajada che l'ana.
Ma prima 'e miche andare
a sas illacanadas
e innidas cossorjas de su chelu
eo
cherjo chi torret
assumancu pro fizos e nepodes.
O omines balentes
corazosos de bona voluntade
faghidel'a manera
chircadel'in tottue
pro chi como che tando
generosa
porrinde-nos sa manu
da bestias chi semos
a omines! Nos torret!
Eo
l'apo connota
cussa bella segnora
e tando
in logos nostros
la giamavamos Paghe!
Titolo | EO L'APO CONNOTA |
Sezione | |
Autore | Giovanni Pira |
Nome | B20040076 |
Anno | 2004 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2004 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |