Deìnu de arbèschias lunàdicas..

In d-una punta 'e monte
unu crapolu... corros a su bentu
a corròchinos bòdios...
Unu trabu muscau
a istràbios de sole in passibale ...
Unu pirastru solu
isalenau.
In sas carbas istraccas
unu nidu...unu corbu
obos de preda 'e sole luguninde
a irgràrios... beffulanos...

Ghèmida 'e terra nuda...
de lesorjas famìas iscorjande
unu sole afferiau
morinde
a traccheddu 'e dentes
mossende sos crapicos de s'intrighinu...

ahi!
mamidda assutta
de buddiores fritta
d'un'ereu 'e prozzebbos... frore iscuttu.

A sucuttu ....
chin sas alas fartadas
sos pessos meos nobales
aggorraos in òspiles de suspu...

Corròchinos de beccu...
abbentada 'e crapolas subadas
in nares de cussènzias cumbessas
chircande... pasu 'e seda...

In rubarjos e predas
ispràsumu 'e pizzinnos isfrorìos...
trepojaos in pittos de Astores ...

sutta chelos de àstragu... e de focu...

Dego

deìnu de arbèschias lunàdicas
zaravallu 'e paràgulas mudas
chene pedes ne alas
supra unu monte
pettus a bentu
isetto galu s'istrina
d'unu pìliu 'e grina noba
ingraninde
in s'ìmbena 'e s'oje
pro sos pizzinnos unu Cras in frore...

Jubanne Piga
carrera 'e Volta
16- 08100
Nùgoro-tel. 35817.

A mezus bìere