De sos ammentos mios sa memòria

Unu mare 'e ammentos remimidos
sun de sa vida mia su siddadu.
Ma chissà cantos nd'apo ismentigadu
chi
dolu mannu
sun isvanessidos!

Si lassare non potto in erèntzia
cussos sentidos chi m'ana lassadu
mi nde dolet abberu
est peccadu
chi de tott'issos non restet presèntzia.

Ca sempre frunzas de dies passadas
sun sos ammentos
comente chi sian

chi sian bonos o chi puru dian
testimonia de proas faltadas.

Si connoschimus sos benes cumpridos
nde podimus sas ìstigas sighire;
a su male si podet impedire
chi fatat passos feos attrividos.

S'amus annottu de cosas faltadas
e de sos dannos chi si sunu fattos

faghimus de manera chi mastrattos
non ruemus in sìmiles tuccadas.

Et est pro custu chi cherzo lassare
de sos ammentos mios sa memoria

non tzertu prò disizu 'e aer gloria
de cantu fattu in su meu andare.

Ma cun s'intentu chi sos fizos mios
non fatan sos isbàglios ch'apo fattu

non solu
ma chi tenten su riscattu
de carchi dannu
finas chi sun bios.

E dogni bene
si nd'apo cumpridu

chi si lu tenzan sempre che siddadu

ca pro issos est fattu e pensadu
e pro su bene issoro cuntzepidu.



Autore: Nino Padda
nàschidu in Thiesi su 15 de sant'Andria de su 1940
apposentadu in Tàtari
carrela Funtana di lu cojbu
6.
Tel: 079.269284.