Dae custa domo chieta

Su bonu cheren a non bi morrer mai
e si la colan timende cada alenu 'e ventu.
Biados! Eo
si m'aviana postu a seperare

avio cherfiu a non bi naschire.
Non ca appo presse de morrer

non ca non m'aggradan
su locu su tempus e sa zente.
Depende torrare a naschire
postu a seperare

dio seperare de naschire torra in sa matessi vidda

dae sa matessi mama
dae su matessi babbu

e de aer sa matessi muzere
sa matessi iza

chin tottus sos dispiacheres chi appo appiu

pro non perder nudda de tottu sas ghias
chi custa vida vona m'at bundau.

Ma a uve dia poder andare

in foras de custa domo chieta

si non b'at unu cantu de terra asciutta
e su sambene est colorande cada vena?

Non m'acciaro pius mancu a sa ventana
pro non bier e pro non intendere

non lego giornales ne rivistas

chirco de non intender radio

de non allugher televisione
pro nd'iserrare infora sa tristura.
Ego isto vene in domo mea.
Ma dae cada muru m'intrat su dolore

nd'appo de s'aju a sizillare jannas!
Bastat de intender canes abbaulande

su thunciu pitzinninu de sa thonca

sas voches de troppas de imbriagos

e in cada cradea
in cada piattu
in cada libru
vio pitzinnos a gana e a disisperu
e mamas chi si los vadiana che panas
e non ana unu mossu 'e cosa de lis dare.

De sa vida mea non avio ciambau nudda

ma
s'avio pothiu
non b'ippo naschiu
e non dio cherrer a naschire torra.