Coro de terra

Fimis fizos arestes
de sa mamma 'e su sole e de s'istria:
maiarzas de lughe e de iscuru
chi nos daian sa titta
ghibera de saniettes de s'eressia.

Umbra 'e paca potessia
arranco in carreras de amentos
debadas chertorande
cuddu pessu derruttu.


Su coro m'an alluttu
impare chin sa tanca...
Coro de terra
chi campat de pane e appartenessia
a custa patria lanza:
impannu de sos babbos
a sos fizos prominta
inue sa vida est sonniu
chi ruet irvenadu
dae sas sannas de fogu 'e sas cardanas.

De custas roccas canas
so babbu e so fizu
che un'alinu de 'entu
che-i s'abba de s'attonzu
chi de su cras ingraidat sas creas.

S'allizan sas ideas
e mi paret anzena custa notte
ue ruet s'isteddu 'e sas raighinas
su chelu irfranchiande.

Unu ballu 'e tres passos son toccande
in sas partas ue naschini sos sinnos;
est su bomborimbò de adiosu
d'ataocados tenores.

Sos betzos son minores
chi su passu ane perdiu
e sos pipios paren chene mamma:
anghelos chene cara in custu mundu.

Ando a sa tzega intundu
iscantzande sa neula de s'ostinu
chi est timorias e isperas e caminu
d'umanidade noa.


Gonario Carta Brocca
Via Lamarmora 186
08022 Dorgali